नानाची दादागीरी

‘फाटकासमोर वाहनं लावु नयेत’, ‘इथे गाड्या लावु नयेत’ लावल्यास असं केलं जाईल, तसं केलं जाईल वगैरे पुणेरी पाट्या आपल्या वाचनात आल्या आहेतच. पण सोशीक पुणेकर सहसा असल्या गोष्टी करण्याच्या फंदात पडत नाहीत. पण नानाच्या.. अहो आपला ‘नाना पाटेकरच्या’ कृत्यांमुळे आमच्या कार्यालयातील कर्मचारी मात्र त्रासले आहेत हे नक्की.

त्याचे झालेय असे की आमच्या कंपनीच्या एका क्लायंटचे कार्यालय हे लॉ-कॉलेज रोडवरील एका गल्लीत आहेत आणि नेमके त्याच्या समोरच नाना पाटेकरांचा बंगला आहे.

कार्यालयाला पार्कींगची फार मोठ्ठी जागा नसल्याने बऱ्याचवेळा गाड्या रस्त्यावरच लावाव्या लागतात. एखाद्याने गाडी चुकुन नानाच्या बंगल्याच्या गेटा-बाहेर लावली तर मात्र त्याची काही खैर नाही.

काही दिवसांपुर्वीच माझ्या एका मित्राची वॅगन-आर एकाबाजुने चेपलेल्या स्थितीत आढळली. बघणार्य़ांकडुन आणि त्या बंगल्याच्या वॉचमनकडुन कळले की नानानेच ती गाडी मुद्दामहुन ठोकली. का? कारण ती गेटच्या समोर लावली होती. आणि असे किस्से बऱ्याच वेळा घडले आहेत.

काल तर मात्र कहरच झाला. माझ्या एका मित्राने त्याची स्कोडा गाडी बंगल्याच्या गेट समोर लावली होती. दुपारी खाली आला तेंव्हा गाडीच्या कडेच्या खिडकीच्या दोन्ही काचा आणि गाडीची मागची पुर्ण काच फोडलेली होती. तो बिच्चारा बघतच होता की नाना पाटेकर तिथे आले आणि त्याला त्याच्या खास शैलीत ऐकवले..

‘ये आपका गाडी है क्या? अच्छा.. बच्चे.. गाडी वापस यहापे लगानेका नही हा.. याद रखना.‘

ठिक आहे.. तो एक मोठ्ठा कलाकार आहे, त्याच्याबद्दल कलाकार म्हणुन मला आदर वाटतो आणि आवडतो सुध्दा, पण एक माणुस म्हणुन मला तरी त्याचे हे कृत्य आवडले नाही बा!

कोण पोलीसांत तक्रार करणार त्याची? आणि नोकरी धंदे सोडुन त्या शिघ्रकोप्याशी कोण भांडत बसणार? आपलीच चुक म्हणुन बिच्चारा मित्र गप्प बसला अजुन काय?

बर अगदी गेटाच्या बाहेरच गाडी लावली आहे, आणि त्याला गाडी काढताच येत नाही बाहेर तर गोष्ट वेगळी. असो.. पोस्ट लिहीण्याचा उद्देश हा, की तुमच्यापैकीच कोणी चुकुन याठिकाणी आलात आणि कुणी तुम्हाला सांगीतले की हा नाना-पाटेकरचा बंगला आहे, इथे गाडी लावु नका, तर त्यावर विश्वास ठेवुन १० कि.मी. लांब लावावी लागली तरी चालेल, पण तिथे गाडी लावु नका.