माझ्याबद्दल थोडेसे

खरं तर देवाने या विश्वाची निर्मीती केली आणि मानवालाही त्यानेच जन्माला घातलं. माझ्याबद्दल मी स्वतःच काही वाईट बोललो तर ईश्वरच्या निर्मीतीचाच मी अपमान केला असं होईल नाsss!! सो.. जास्ती काही नाही, थोडेसेच, माझ्याबद्दल.

वय वर्ष ३४, विवाहीत, दोन गोंडस मुलांचा बाप. संगणक अभियंता, सॉफ्टवेएर मधील किडे (Bugs) पकडण्याचे काम (Testing) करतो.

मनमिळावु, Happy-Go-Lucky, थोडास्सा उर्मट/आगाऊ, खाईन तर तुपाशी नाहीतर उपाशी या पठडीत मोडणारा. छोट्या छोट्या गोष्टींनी मन खट्टु करुन घेणारा आणी तितक्याच छोट्या गोष्टींमध्ये आनंद शोधणारा मी.

सायकलींग ची प्रचंड आवड निर्माण झालेला, मराठी लेखनाची आवड असणारा, फोटोग्राफीबद्दल प्रचंड पॅशनेट असणारा अस्सा मी.

ब्लॉगवरील कथांबद्दल वाचकवर्गाचा ठरलेला प्रश्न म्हणजे “हे सगळं सुचतं कसं?” खरं तर ह्याचं श्रेय असंख्य इंग्रजी चित्रपट, डिस्कव्हरी वरील “जेल्ड अ‍ॅ्ब्रोड” आणि सर्वात महत्वाचे “जेम्स हॅडले चेस” ह्यांच्या कॉलेजजिवनात वाचलेल्या गुन्हेगारी कथा. त्यांच्या कथांमुळेच मला अश्या गुन्हेगारी कथा लिहायला प्रेरणा मिळते. काही चित्रपट मनाला भावतात, पण वाटतं असं नं घडता, तसं घडलं असतं तर? मग तेथील एखादा धागा घेउन एक नविनच रसायन निर्माण होते. तुम्हा सर्वांना कथा, माझं लिखाण आवडते हे वाचुन आनंद होतो. तुमच्या प्रत्येक प्रतिक्रिया लिहीण्याचा हुरुप वाढवतात. प्रत्येक प्रतिक्रियेला उत्तर देता येतेच असे नाही, परंतु त्या वाचतो मात्र नक्की. तेंव्हा जरुर प्रतिसाद देत रहा…..

“डोक्यात भुणभुणणारा मराठी भुंगा” ह्या माझ्या ब्लॉगला ‘स्टार-माझा’ वाहीनीने बेस्ट मरा्ठी ब्लॉग म्हणुन सन्मानीत केले.

ह्या ब्लॉगच्या माध्यमातुनच काही चांगल्या ओळखी झाल्या आणि त्यातुनच एक कमर्शीयल नाटक लिहायची संधी मिळाली आहे. लवकरच हे नाटक रंगभुमीवर येत आहे.